Muqdisho, (insidesomalia.org) - Ra'iisul wasaaraha Somalia Nuur Xasan Xuseen (Nuur Cadde) ayaa daboolka ka qaaday in qaraxii shalay uu ahaa mid si lama filaan ah ku dhacay, isla markaana uu aad uga xun yahay.

"Waxaa wax laga xumaado ah in qarax lagu dilo haween aan waxba galabsan oo ka shaqeynaya nadaafada, waana cambaareynaynaa cidda ka dambeysa noocay doonto ha ahaatee" ayuu yiri Ra'iisul wasaare Nuur Cadde oo shalay qabtay shir jaraa'id.

Nuur Cadde wuxuu sheegay in qaraxaas uu ahaa mid ay ka dambeeyeen kooxo dano gaar ah leh, isagoo sheegay inuu u duceynayo inta dhaawacantay inta dhimatayna uu RABBI uga barbaryayo Janno.

Qaraxii shalay ka dhacay wadada Maka Al-Mukaramah ayaa sababay inay dhintaan ku dhawaad 17-haweenka qashinka ka shaqeeya ah, kuwaasoo si lama filaan ah ay ugu qaraxyaday miino dhulka dhinaciisa la geliyay.

Dhaawacyadii ka dhashay qaraxaas ayaa la dhigay isbitaalka Madiina halkasoo lagu daweynayo, iyadoo dhaqaatiirta ku howlan daweynta haweenkaas ay sheegeen in laba ka mid ah la waayay nooca dhiigooda.

Taliyaha Booliiska Dowladda Federaalka KMG ah ee Soomaaliya Gen. Cabdi Xasan Cawaale (Qaybdiid) oo ka hadlay qaraxaas ayaa sheegay inay ku tuhmayaan kooxda Al-shabaab, isagoo iska fogeeyay inay iyagu ka dambeeyaan; waxayna kooxaha ka horjeeda Dowladda ku eedeeyeen isla shalay qaraxaas Dowladda.